قصيدة بنات النبي للحاج باسم الكربلائي
كومن بنات النبي خيطن خيمجن عبي
هاي الزلم مت تضل باجر وراجن سبي
يله استعدن لباجر هليله كلش كصيره
باجر زلمنه تسافر كلمن يروح لمصيره
انسن دلال الهواشم انسن صفات الاميره
كل وحده تلزم طفلها لوذن اسيره باسيره
وبسرعة كون المشي احنى نسو نختشي
لا يبقى عدجن امل باجر وراجن سبي
من هسه خليني افكر لمن تصير المسيه
ليلة حامي رقية واني علية البقية
من الشمر يعتنيني لا لا تطيحن علية
خلوني لوحدي لسياطة لمن يقطع ايديه
باجر سياط الهضم خل تنزل على العظم
خلي ابشر الكفل باجر وراجن سبي
ما ضل وكت يالحرايم باجر تسافر زلمنه
باجر غطانه سحابه ناتج مداخن خيمنه
صيرن درع يا خواتي واني اشيلن علمنه
احنه ثماله وارامل بالغربه من يحترمنه
نصبغ وجهنة بدمه حتى العدو نوهمه
كلشي صفه محتمل باجر وراجن سبي
لالا تلفضن اسامي خاف العدو يكتشفنا
يبقى يسب بالغوالي يعرفنا نقطة ضعفنا
كل غالي باجر نتركه ماكو اهم من شرفنه
والي يطمهنا باجر كلش قريبه نجفنا
باجر حرب تستمر بين الخدر والشمر
واقع صبح مو مثل باجر وراجن سبي
شوفن وجوه الغوالي ساعة واحفظن علايم
يختلف باجر شكلهم لمن تطيح العمايم
جثه تطيح على جثه تلتم جسوم الهواشم
رمله ياليله تحيله منهو ومنهو جاسم
كل الجثث تنسحك تتكطع وتفترك
انسو عتاب الاهل باجر وراجن سبي
مهد الطفل خلي نبعده شوفوله خيمه بعيده
رمله بعد لا تهلهل شمع العرس ما نريده
لمن تشوفن كفيلي لحد تباوع على ايده
وابن امي باجر نشوفه سيف اليمزك وريده
خلي ننظر لركبته وكت الظهر ذبحته
ودعنا بس بالعجل باجر وراجن سبي
من هسه صيرن سبايا وانا الحرس والكفيله
اتعلم على الحراسه ما ضل وكت هي ليله
ما نشتكي من المنا من يسمع ونشتكيله
ادري علينا صعبة قصة سفرنا طويلة
باجر زند ينبتر باجر ظهر ينكسر
على الشاطي يوكع جبل باجر وراجن سبي
لو وحده باجر ولوها لازم تخف بمشيها
خلها تنادي يا زينب علية تأشر بيديها
حتى يعرفني ويجيني بلكت بعد ما يجيها
اختك يا راعي الكفالة كلها تدور عليها
يا ويلي وكت الظهور يرجعلي خالي المهور
اعرف اخوية انجتل باجر وراجن سبي
ليست هناك تعليقات:
إرسال تعليق